Ahurea

Ina rā te hiranga o ngā tikanga tuku iho. Ma ēnei e mau tūhonohono ai te here o te iho matua ki ngā mātua tupuna. Ā, he kaupapa nui tēnei, te pupuri ki te reo, ki ngā tikanga, kia pai ai te tū a te tamaiti ki tōna tūrangawaewae ‘hei raukura mō tōna iwi’. Nō reira, ko tā mātou o Te Kura Kokiri he hāpai ake i ngā tikanga tuku iho ā ngā tupuna hei painga mo te tamaiti i tēnei ao e noho nei tātou.


Kapa Haka
No te ruinga rawa o te kākano i nui ai te remurere o Te Kura Kokiri ki ngā kura o Te Whare Tapere. Nā, i mana ai te kura i tōna maia ki ngā mahi hāpai ake i ēnei taonga.

Mo te kura tuatahi, ka hono anō te kapa ki ēra atu peka o Te Wharekura o Tauranga Moana. Ā, hui katoa, ka puta ko te kapa haka o Te Wharekura o Tauranga Moana ki ngā whakataetae ā rohe o Tauranga Moana. Ki te maringanui, ka uru tomo atu te kapa ki ngā whakataetae ā motu. He hiranga nui ta tēnei, mōna e puta ai ngā whakaaro, e wahaina ai ngā nawe, e werohia ai ngā wero a te kura ki te moana ka tahi, ki te motu whānui pea hoki. Mō te wharekura, ka hono atu ki te kapa o Ngā Kura Kaupapa Māori o Te Puku o te Ika a Maui. He kohinga kura tēnei no ētahi o ngā kura kaupapa Māori no te rohe o te Waiariki. Ā, kia tae te wā, ka tū ko te kapa o ‘Te Puku’ ki ngā whakataetae a rohe o Te Arawa, me te manako kia whai wahi atu ki ngā whakataetae ā motu.


Puoro
Ina rā he kaupapa hirahira rawa, he kaupapa hāngai tā te kura, ka hahua ake ko te pene o te kura. No te tau 2003 te rokohanga o te pēne tuatahi o te kura, ā, ka hahua anō, ka hahua anō mo ngā kaupapa nui whakaharahara o te kura.

He kaha anō te ringa haututu a te Māori ki ngā taonga puoro, ā, tūturu ko te whakatangi kitaa. He kaupapa nui tēnei ki Te Kura Kokiri. Kia puta ai te tamaiti i te kura me ngā pūkenga raweke i te kitaa ka tahi, ā, puta noa ki ngā āhuatanga katoa o te puoro.


Whakaari
Ka mutu pea i te kōrero he iwi whakaari tātou te iwi Māori. No reira ko tā mātou i Te Kura Kokiri he poipoi i te tamaiti kia tipu ora tōna katoa, tūturu ko te mahi whakaari. Ia wānanga reo (he wānanga mo te timatanga o ia wāhanga kura), ka mahi whakaari ia kāhui o te kura, ā, ia pō miharo (he whakaaturanga o ngā mahi ia wāhanga), ka whakarite whakaari ia akomanga.

E tino hiahiatia ana te whakatū i tētahi whakakitenga whakaari nui whakaharahara nei. Heoi, e rapu tonu ana i ētahi pūkenga hei whakahaere i tēnei, ka oti he pae tata tēnei, ā, mo hoa nei ia e whakamaua ai kia tina.